بسم الله الرحمن الرحيم
اخوتى الاحبة متابعى يوميات السطوحى الغشيم ومراته محاسن الان موعدنا مع الحلقه العاشره من اليوميات وارجو من الله ان تنال اعجابكم
والان نبدا مع الحلقه رقم

10

شوفو يا جماعه انهارده طبعا السطوحى سرح غيطه انهارده يتطمن على زرعة البصل بتاعته وعنده شوية شغل فى الارض وحيعدى يجيب ربه للبهايم بتاعته
لكن وهو شغال لقى المحمول بتاعه بيرن وبص فى الرقم المتصل لقاه الحاج دسوقى ابو ابراهيم جارهم فى بيته القديم يعنى جار امه دلوقتى
فحس ان فى مشكله عند امه فضغط على زرار قبول المكالمه
الو سلام عليكم
وعليكم السلام ورحمة الله وبركاته
ايوه يا عم دسوقى خير
خير ان شاء الله انت فين دلوقتى
انا فى الغيط فى ايه قلقتنى
طيب يا سطوحى انا عند امك دلوقتى انا وخالتك ام ابراهيم وامك تعبانه شويه
مالها امى جرالها ايه
شكلها كده غيبوبة السكر اللى بتبقى تجيلها بس هى فاقت دلوقتى الحمد لله والدكتور محمود الخراشى عندها دلوقتى
ما تكذبش عليا يا عم دسوقى الله يخليك وقولى مالها امى
والله عادت كويسه بس انا اتصلت بيك يا اخى عشان تيجى تشوفها انت عارف انها قاعده لواحدها
طيب يا عم دسوقى جاى على طول مسافة السكه وشكرا على اتصالك مش عارف اودى جمايلك دى فين
عيب عليك يا سطوحى دا احنا اهل
قفل السطوحى المحمول بتاعه وحمل الربه على العربيه وجرى على البيت وعرف محاسن وطلعت معاه جرى على بيت الحاجه منيره
السلام عليكم ازيك يا عم دسوقى امى فين
وعليكم السلام جوه فى اوضتنها معاها الدكتور محمود وخالتك ام ابراهيم
دخل السطوحى ومحاسن على امه فى الاوضه

السلام عليكم ازيك يا دكتور محمود
وعليكم السلام ورحمة الله وبركاته ازيك يا حاج سطوحى
امى اخبارها ايه يا دكتور
ما تقلقش يا عم امك عادت كويسه الحمد لله هى بس السكر كان على عندها شويه ما انت عارف ان امك ما بتسمعش الكلام يا حاج سطوحى
تعالى يا سطوحى انا كويسه
اما انت عامله ايه ياما الف سلامه عليك
الله يسلمك يا حبيبى انا عدت كويسه
مش قلتلك يا اما تيجى تسكنى معايا من بعد ما ابويا مات
وسيب بيت ابوك لمين يا سطوحى
هو يعنى حيجراله ايه يعنى يا اما
لا يا سطوحى ما ينفعش بيت ابوك يتقفل ابدا حتى لو كان مات
ربنا يديك الصحه وطولة العمر يا اما
ما تعملش فى نفسك كده يا سطوحى امك كويسه هى بس تاخد الدوا اللى انا كتبتهولها ده وتحافظ شويه فى الاكل وهى حتبقى تمام ان شاء الله
شكرا يا دكتور محمود تاعبينك معانا
ما تقولش كده يا راجل دا احنا اهل
حتوكل انا على الله بقى هى ما عادتش محتاجانى دلوقتى بس اهم حاجه العلاج والمحافظه على الاكل
وياريت حد يبيت معاها يا سطوحى ما ينفعش تنام لواحدها
ان شاء الله يا دكتور متشكرين قوى

وخرج الدكتور ومعاه السطوحى يدفعو لبره البيت وكانت دخلت محاسن على الحاجه منيره
الف سلامه عليك يا حماتى
الله يسلمك يا محاسن
مش لو كنتى بتسمعى الكلام كان زمانك فى وسطنا يا حماتى
انا ما بعرفش انام غير فى فرشتى يا محاسن
طيب وهو بيتنا يعنى بيت حد غريب
لا بس حقفل البيت يعنى يا محاسن
طيب خلاص اخلى الواد عبده ييجى يبيت معاك كل ليله
مش ضرورى يا محاسن حنحرحره كل يوم رايح جاى
يا ختى على قلبه زى العسل انت عارفه انه متعلق بيك واهو يسليك ويكون جنبك عشان لا قدر الله لو حصل حاجه يعرفنا
طيب ماشى
هم فين العيال يا محاسن
لسه ما جوش من المدرسه
طيب روحى روحى انت بقى انا عدت كويسه وشوفى ولادك بدل ما يروحو ومايلاقوش حد فى البيت
لسه بدرى لى اما يرجعو من المدرسه شويه كده وامشى

دخل السطوحى على امه وقالها
ايه ياما رايك لو تسمعى الكلام وتيجى تقعدى عندى فى البيت
ردت محاسن وقالت
انا قلتلها ما رضيتش بس انا اتفقت معاها ان الواد عبده يبقى ييجى يبيت معاها كل ليله احسن ما تنام لواحدها
طيب كويس وماله ده راى كويس

خلى مراتك تروح بقى يا سطوحى عشان العيال زمانهم عادو راجعين من المدرسه
ما تشغليش بالك انت بالعيال يا اما وخدى بالك من نفسك انا حروح دلوقتى اجيب العلاج واجى ولما ابقى اجى تبقى هى تروح للعيال عشان ما تفضليش لواحدك
ربنا يخليكو ليا يا ضنايا وما يحرمنيش منكم ابدا
طيب خد فلوس عشان العلاج
خيرك موجود يا اما عيب عليك كده
يابنى كفايه عليك مصاريفك انت وال 3 عيال وانا معاش ابوك مكفينى
مهوانت ما تعرفيش لسه بقى الخبر الجديد انا كنت جاى اقولك انهارده بس ربنا جابها من عنده وجبتينى على مشمى
خير خبر ايه
انهم يعنى مش 3 عيال بس كلها كام شعر كده ويبقو 4
يالهوى انت حامل يامحاسن
ليه كده يا اما يالهوك ليه بس ده رزق من ربنا
ربنا يعينك يا حبيبى ويرزقك برزقهم
ربنا يخليك ليا يا اما ويباركلنا فى عمرك
اسيبك بقى واروح انا اجيب العلاج يللا سلام عليكم

ومشى السطوحى وجاب العلاج لامه وروحت محاسن للعيال وفضل عندها لحد عبده ما جه ومعاه شوية هدوم ليه وشنطة المدرسه عشان يبيت مع نينته ويقوم الصبح على مدرسته


وبكره نكمل بقى يوميات السطوحى ومراته محاسن الى لقاء ان شاء الله

 

ابوحمزه الجمل كتب:

[color=Green]


ربنا يخليكو ليا يا ضنايا وما يحرمنيش منكم ابدا

كلمة ياضنايا اجمل كلمة ممكن تسمعها في حياتك
حلوة الحلقة ياجمل
انا كنت عملت زي الواد عبده ورحت نمت مع ننتي اما جدي الله يرحمه مات ايام بيت العيلة
حلقة رائعة ياجمل
مشكور على ابداعتك

 

كلمة ياضنايا اجمل كلمة ممكن تسمعها في حياتك
حلوة الحلقة ياجمل
انا كنت عملت زي الواد عبده ورحت نمت مع ننتي اما جدي الله يرحمه مات ايام بيت العيلة
حلقة رائعة ياجمل
مشكور على ابداعتك[/quote]

انا قلتلك بتعز المصايب
هههههههههههههه
ماتعرفش والله انا مبسوط اد ايه بمتابعتك لليوميات على الاقل انت اللى بتبل ريقى على طول
اشكرك على مرورك الدائم اخى هانى

 

انا شخصيا لا ادخل المنتدى حاليا إلا متابعة هذه اليوميات
ومنتظرين الجديد
ولسه كام حلقة ولا لسه الحلقات مخلصتشي

 

seifelromy كتب:

انا شخصيا لا ادخل المنتدى حاليا إلا متابعة هذه اليوميات
ومنتظرين الجديد
ولسه كام حلقة ولا لسه الحلقات مخلصتشي

شوف ياسيدى اولا انا بشكرك على متابعتك المستمره لليوميات
ثانيا احب اقولك ان كل حلقه من اليوميات دى فكرة يومها يعنى لو مافيش فكره فى دماغى يبقى مافيش حلقه
اللى حيساعدنى فى انى الاقى افكار جديده حتكون اليوميات دى مستمره على طول ان شاء الله
فنفسك معايا لو عندك افكار او اقتراحات تعرفنا وان شاء الله ربنا يسهل وتكون دائمه

شكرا اخى سيف على المتابعه مره احرى
اخوك ابو حمزه2

 

 

ابوحمزه الجمل كتب:

seifelromy كتب:

انا شخصيا لا ادخل المنتدى حاليا إلا متابعة هذه اليوميات
ومنتظرين الجديد
ولسه كام حلقة ولا لسه الحلقات مخلصتشي

شوف ياسيدى اولا انا بشكرك على متابعتك المستمره لليوميات
ثانيا احب اقولك ان كل حلقه من اليوميات دى فكرة يومها يعنى لو مافيش فكره فى دماغى يبقى مافيش حلقه
اللى حيساعدنى فى انى الاقى افكار جديده حتكون اليوميات دى مستمره على طول ان شاء الله
فنفسك معايا لو عندك افكار او اقتراحات تعرفنا وان شاء الله ربنا يسهل وتكون دائمه

شكرا اخى سيف على المتابعه مره احرى
اخوك ابو حمزه2

ههههههههههههه
ياسيدي دي عمليه صعبة قوي
المهم ان شاء الله لو فيه فكره هاقولها لحضرتك وانته ممكن تعمل بيها حلقه
والله يعينك

 

شوفو يا جماعه انهارده طبعا السطوحى سرح غيطه انهارده يتطمن على زرعة البصل بتاعته وعنده شوية شغل فى الارض وحيعدى يجيب ربه للبهايم بتاعته

أكَن انت ياسي الأستاذ بستكردنا ليكونش مفكرنا أساتذه يا درعخي بصل ايه اللي بيزرع مع الربه ولا يعني اكمنك مسافر بلاد بره هتضحك علينا

 

ابوحمزه كتب:

شوفو يا جماعه انهارده طبعا السطوحى سرح غيطه انهارده يتطمن على زرعة البصل بتاعته وعنده شوية شغل فى الارض وحيعدى يجيب ربه للبهايم بتاعته

أكَن انت ياسي الأستاذ بستكردنا ليكونش مفكرنا أساتذه يا درعخي بصل ايه اللي بيزرع مع الربه ولا يعني اكمنك مسافر بلاد بره هتضحك علينا

ياعم ابو حمزه ما تيجى اما اوديك مسلسل سر الارض ونرجع
صلى على النبى
انا صحيح فلاح نص كم وابويا دايما يقول عليا فلاحين اخر زمن
بس دى بقى كانت شغلتى السنه اللى فاتت فى الاجازه بتاعتى
واالك شوية معلومات
البصل بيتزرع بعد البطن الاولى من الربه وفى ناس بتجيب بطنين بس لازم البطن التانيه تتحش بسرعه عشان تلحق تجهز الارض للبصل وما تتاخرش
فمعنى كده ان كان البصل بيتزرع بعد البطن الاولى او التانيه قيبقى عندك لسه 3او4 بطون ربه والبصل مزروع
وبناء عليه يبقى فى ربه وقت البصل ما يكون مزروع
وياسيدى انت نازل مصر اليومين دول واليومين دول البصل والربه موجودين وحتشوف بعينيك
وبناء عليه اطالب باقصى العقوبه للمجنى عليه وبراءة المتهم

ههههههههههههههههههههه

 

خلى مراتك تروح بقى يا سطوحى عشان العيال زمانهم عادو راجعين من المدرسه
ما تشغليش بالك انت بالعيال يا اما وخدى بالك من نفسك انا حروح دلوقتى اجيب العلاج واجى ولما ابقى اجى تبقى هى تروح للعيال عشان ما تفضليش لوحدك
ربنا يخليكو ليا يا ضنايا وما يحرمنيش منكم ابدا




مبدع بجد يا أبو حمزة

كونش فاكر يا حيلي إنحنا هنسيبك توقف اليوميات بتاعتك دي يبقي إنت بتحلم ، هي طوريتة يا جدع هتكتب يعني هتكتب بإذن الله ،

الله يجبر بخاطرك إبقي خلي السطوحي يجبلنا من على الجسر شوية سبانخ وسلق معاه الحلقة اللي جاية .

 

 

بدون مجامله والله يا ابو عمار انت من الناس اللى بتبسط لما يمرو عليا وبتبسط اكتر لما يكون الموضوع عاجبك
وان شاء الله حفضل اكتب على طول
بس انا عايز الناس يعنى تساعدنى دى اول مره اتجار واعمل فيها فتك واعمل قصة وياريت عملت قصه وسكتت لا عملت مسلسل شايف الافتراء
ربنا يقدرنى واكون عند حسن ظن كل الناس ان شاء الله
وشكرا يا ابو عمار على مرورك الكريم اللذى دائما ما يشرفنى

 

SAAD.BASHA كتب:

أبو حمزة 2 ياجااااااااااااااااااااامد

بيقولها عيب عليك يااما ... عمك السطوحى برنس



هههههههههههههههه تسلم بجد ومستنى الحلقة الحادية عشر

هههههههههههههه
دعواتك يا باشا
ربنا يسهل

 

ممتاز ياابوحمزه وتشوقنا للاحداث المقبلة ومتحرمناش من ابداعاتك الجميلة

 

redaaswelam كتب:

ممتاز ياابوحمزه وتشوقنا للاحداث المقبلة ومتحرمناش من ابداعاتك الجميلة

ربنا يخليك ياعم رضا
وعلى فكره انا كده عرفتك
فراخ
وابنك احمد
والمشروع
ياعم دا انا ياما اشتريت من عندك فراخ
وبعدين الواد احمد ده كان اقرع كده من عند ربنا مش حلاقه
وكان مكفر القطط اللى فى المحل بتاعكم
ههههههههههههههههههههههههه

شرفنى متابعتك يا ابو احمد

 

مشكور يا ابو حمزه على ابداعاتك المتميزة و يوفقك و تكملنا بقيت الحلقات

 

nonacool كتب:

مشكور يا ابو حمزه على ابداعاتك المتميزة و يوفقك و تكملنا بقيت الحلقات

ربنا يكرمك اختى الكريمه
ولكن الحلقات شغالة بفضل الله
ووصلت دلوقتى ل 19 حلقه وان شاء الله الحلقه ال 20 قريب
بس دعواتك معانا

شرفنى مرورك