الغلطة فعلا غلطتك يا مزلقان
أصلك جبان
فتحت صدرك للهوا
لجل يموت كل اللي عدّى في المكان
فعلا حقيقي
كل وقت وله أدان
بس نسيت تحكي تاريخك من زمان
لجل يصدّق كل واحد مننا
إن اللي واقف يحرسك ملهوش لسان
يوم يقفلك ...... يوم يفتحك
لجل يموت كل اللي صدّق مننا
إن الطريق أمن وأمان
يعني إيه قطر يعدّي
ومنتحرمشي م البنات
ومنتحرمشي م البنين
امشي ف سكات
مسمعشي صوتك
لجل تصدم كل اللي عدى من سنين
حتى الزهور أطفال صغار
باعوا حياتهم للنهار
كتبوا بداية الانكسار
آخرتها إيه آه يا بلد
آخرتها نار
قالوا انتحار
معقولة أتوبيس المدارس
راح يتنّح للقطار
معقولة يِغلط غلطته
في وضح النهار
والقطر يِوقف سكته
لجل يعدّي ميت حمار
دوس الغلابة يا قطار الموت
أصل الحياة ملهاش تمن
أصل اللي ماتوا م الغلابة
والغلابة ياما ماتوا من زمن

مين الضحية في بلدنا
قلت لي :
واحد بيفتح مزلقان
ولا سائق عمره عدّى من زمان
ولاّ سوّاق القطار اللي دايس ع الأمان
ولا أطفالنا وزهورنا اللي ماتوا في الأوان
ولاّ وزير النقل اللي قدّم استقالته م المكان

صدقوني الغلطة فعلا غلطتك يا مزلقان
وياريت تبطل بس حركات الجنان
وتقول أصل اللي واقف جمبي كان جبان
فتح الطريق
لجل يِنفّذ خُطته
ويداري دايما عَملته
أصله مُخطط من زمان
افتح طريق المزلقان
لجل نضحي بالعيال
يوم ما ضاع بينا الأمان
أسيوط الحزينة في حداد
باعوا ولادها في المزاد
واحد خلاص خمسين خلاص
كله رايح في الميعاد

 

 

فتح الله عليك يااستاذنا

الوقتى فعلا هيا غلطه مزلقان

 

شعر جامد