أولا أحب أسلم على كل الناس الموجوده فى المنتدى الغالى
وندخل فى الموضوع
عندنا هاجس بقالنا كام بيوم بيقولنا المفروض تعملوا حاجه مفيدة للبلد ويكون لها الأثر الكبير والطويل على أرض الواقع
فأيه رأى الشباب الحلوين فى الهرى ده
ممكن نصحى شوية ونحاول ولا مش ممكن

وطبعا هنحتاج آراء العضوات المحترمات بالمنتدى
على العموم أنا شخصيا بقول ممكن خصوصا إن لنا تجارب سابقه وكانت ناجحه جدا

بس ممكن تانى نفكر مع بعض ونقترح على بعض نعمل ايه ولا نفك

فى نقاش على الفيس بوك إقترح بعض الشباب أكثر من فكرة رائعه جدا
وإقترحت أختنا شيماء محمد فكرة البراميل بتاع القمامة وتناقشنا فيها كثير
خصوصا انها راودت الكثير منا هذه الفكرة

منتظر التفاعل الشديد جدا منكوووووووووووووووو

 

ما تتعبش نفسك يا ا ستاذ نبيه

 

لسه فيه أمل .. لسه الجايات كتير

مهو قالوا فى المثل .. لسه فى الدنيا خير

موفق يا بلبل و اللى فيه الخير يقدمه ربنا

انت شاب محترم و اكيد فيه زيك كتير و هيتفاعلوا مع الموضوع

محمد الشرقاوى

 

ام خالد كتب:

ما تتعبش نفسك يا ا ستاذ نبيه

ليه بس يا أم خالد ما أتعبش نفسى ليه

 

khaled zezo كتب:

لسه فيه أمل .. لسه الجايات كتير

مهو قالوا فى المثل .. لسه فى الدنيا خير

موفق يا بلبل و اللى فيه الخير يقدمه ربنا

انت شاب محترم و اكيد فيه زيك كتير و هيتفاعلوا مع الموضوع

محمد الشرقاوى

 أشكرك يا محمد بيه
وربنا يكرم إن شاء الله
بس محتاجين نتناقش أكثر فى الموضوع ولذلك انا هطرح أراء الناس على الفيس بوك وأنسخها وأجيبها هنا نتناقش فيها على المنتدى

 

ده كان رأى البشمهندس أحمد محى الدين معد الخطط والبرامج في رفع النفايات في الرياض سعوديه

ـــــــــــــــ

أحمد محي الدين ماشاء الله على الحماس . أنا شايف ناس بتحاول تبني وده أفضل أنواع الخير.

اولا الفكره ممتازه لكن لابد من دراستها دراسه وافية ..
طبعاً مشروع جمع القمامة ده مشروع ضخم ويحتاج معدات وتمويل وخطط وكذلك متطوعين.
أما عن المتطوعين فأتوقع موجودين .وعن التمويل إن شاء الله موجود من هذا الجمع الكريم . ونحن معكم طبعاً في هذا البند.

وعن الخطط وطرق التفريغ فهذا بند يشترك فيه ثلاثة اطراف كل منهم علية واجبات.
الاول : الوحدة المحلية بعدد المعدات والعمال.
الثاني : نحن، بخطة التفريغ وطريقته.
الثالث : المواطنين، بتعاونهم في القاء النفايات داخل البرميل.

في تصوري أن كل هذه البنود ميسره بإذن الله ولكن المشكله ستكون في المعدات والعمال وطريقة تفريغ النفايات.

محدش يفهمني غلط وإني بحاول اعجز الناس ... لا .

كلنا بنحاول ندرس ونتشاور في المشروع المفيد ده.

لازم اخوانا الشباب في البلد يختارو حد يزور الوحدة المحلية . طبعاً هي مسؤله عن رفع النفايات ولكن هل المعدات لديهم كافية للمرور على كل البراميل في يوم واحد ؟ (لا أتوقع)
هل المعدات لديهم بها اعطال؟ (أكيد)
هل لديهم الرغبة في الوقوف معنا في هذا المشروع ؟؟؟؟

مبدئياً أنا عاوز اعرف كم عدد المعدات وأنواعها وكل معده ترفع كام طن تقريباً في الحموله الواحده ، وممكن تعمل كام رحله في اليوم . وكم عدد العمال وعدد ساعات العمل الفعلي للعمال.
وهل برميل واحد في كل شارع يكفي لنفايات يوم أو يتحمل ليومين او اكثر.

ومن ناحيتي إن شاء الله هحاول من خلال المعلومات دي اعمل خطة متواضعه لرفع النفايات.
للعلم ياجماعه ده مجالي إعداد الخطط والبرامج في رفع النفايات في الرياض .

وفي رأي اننا نبدأ بحاره واحده الاول حتى نستطيع السيطره عليها وفي حال نجاح الفكره وان شاء الله تنجح .. نعممها على باقي الحارات.

ياشباب لازم نشوف الإمكانيات الأساسيه لهذه الخدمه وهي المعدات تقدر تساعدنا في هدفنا ولا لأ ..
احنا مش عاوزين نحلم ونتصدم بالواقع .. الاول نشوف المعدات تنفع للمشروع ده والعمال وان نفعت .. نتوكل على الله ونكمل

 

ربنا معاكم لعلمك الخاص انا احب الاعمال التطوعية
وشاركت كم مرة فى مثل هذه الاعمال وعندما لا استطيع الوقوف لاننى امرأة وهم شباب
اتبرع باجر عامل او ابعت اولادى الصبيه للمشاركة بس ياريت المجلس المحلى يتنشط بقى
واعلم اننى قلبى ينفطر على الشباب وبزعل على احوالكم

 

ام خالد كتب:

ربنا معاكم لعلمك الخاص انا احب الاعمال التطوعية
وشاركت كم مرة فى مثل هذه الاعمال وعندما لا استطيع الوقوف لاننى امرأة وهم شباب
اتبرع باجر عامل او ابعت اولادى الصبيه للمشاركة بس ياريت المجلس المحلى يتنشط بقى
واعلم اننى قلبى ينفطر على الشباب وبزعل على احوالكم

  طبعا العمل التطوعى له مذاق خاص وإحساس رائع عندما يشعر الشخص انه بيخدم الناس لله وليس من أجل منصب او مغنم
ومشاركتك فى مثل هذه الأعمال شىء رائع طبعا فلا تبنى الأمم إلا بمكارم الأخلاق والعمل الخدمى هو أرقى مراتب الأخلاق
ولان الدولة ليس لها خطة واضحة لمشكلة القمامة فلا بأس أن نبحث عن حلول وموارد أخرى ولا نعتمد فى كل شىء على الدولة
وكل ما نتمناه أن تظهر بلدنا فى مظهر جمالى متحضر وأن تكون مثال يحتذى به فى الرقى الأخلاقى والخدمى أيا كان من هو القائم عليه
فلا مكان بيننا لمن هم لهم أغراض سياسيه أو حزبية
الأسمى عندنا جميعا هو الصالح العام لكل الناس ونحن آخرهم ويعلم الله ذلك
ونسأل الله التوفيق
فانا شخصيا مازلت أرى أن الشباب أولاد أو بنات هم من سيبنوا هذه البلد
والله المستعان

 

فعلا الاحزاب فشلوا جميعا جميعا والشعب عمل اللى عليه واكتر
واحنا على مستوى البلد نحل مشاكلنا بايدينا

 

ام خالد كتب:

فعلا الاحزاب فشلوا جميعا جميعا والشعب عمل اللى عليه واكتر
واحنا على مستوى البلد نحل مشاكلنا بايدينا

بالظبط
اشكرك لتفاعلك واتمنى المشاركة الدائمه أم خالد
ــــــــ
العمل الجماعي هو القدرة على العمل معا نحو رؤية مشتركة. القدرة على توجيه الإنجازات الفردية باتجاه الأهداف. ذلك هو الوقود الذي يسمح للناس العادية لتحقيق نتائج غير عادية.
- أندرو كارنيجي

الجماعى ليس الجماعه هههههههههههههههههههههههههه
الواحد تعب من الجماعات     والاحزاب

 

الجماعة اتظلمت ويا بخت من يقف مع المظلوم
ومش نهاية العالم وكفاية انهم حاولوا
وأى عمل هانقوم به سيكون لوجه الله
أليس أماطة الاذى عن الطريق صدقة
أنا بالامس نظفت الشارع انا وأولادى
وقلت لهم نظفوا امام جارتنا قال ابنى الصغير
واحنا مالنا قلت له صدقة جرى ونظف وهو مبسوط

 

ام خالد كتب:

الجماعة اتظلمت ويا بخت من يقف مع المظلوم
ومش نهاية العالم وكفاية انهم حاولوا
وأى عمل هانقوم به سيكون لوجه الله
أليس أماطة الاذى عن الطريق صدقة
أنا بالامس نظفت الشارع انا وأولادى
وقلت لهم نظفوا امام جارتنا قال ابنى الصغير
واحنا مالنا قلت له صدقة جرى ونظف وهو مبسوط

جميل والله
ربنا يكرمك وياريت كل الناس زيك كده
كان زمان حاجات كتير إتغيرت
مش على أد القمامة بس
والأجمل تربية الأطفال على نفس المبادىء المحترمة
جزاكم الله خيرا

 

وده أحد آراء الفنان الكبير محمد عبدالله على موضوع برميل القمامة على الفيس بوك

Artist Mohamad Abdalla بالنسبه لنشر الوعى ممكن كل يوم خميس تجيب شاشه عرض فى مكان وتعمل تجمع وتعرض موضوع معين خاص بالبلد او بصفه عامه ومع التعود خلاص الناس عرفت المكان ده فيه لقاء اسبوعى ناس هتعرض مشكله معينه او هتقول حاجه مفيده وتانى حاجه مجله توعيه صغيره ابيض واسود خاصه بالبلد وتوزع مجانا ( وعربيه ميه ترش البلد ليل نهار حرام يعنى الواحد يلبس ويتشيك ويحط جل وعلبال مايوصل ع المحطه يلاقى نفسه كله تراب

 

نبيه نبيه طه كتب:

وده أحد آراء الفنان الكبير محمد عبدالله على موضوع برميل القمامة على الفيس بوك

Artist Mohamad Abdalla بالنسبه لنشر الوعى ممكن كل يوم خميس تجيب شاشه عرض فى مكان وتعمل تجمع وتعرض موضوع معين خاص بالبلد او بصفه عامه ومع التعود خلاص الناس عرفت المكان ده فيه لقاء اسبوعى ناس هتعرض مشكله معينه او هتقول حاجه مفيده وتانى حاجه مجله توعيه صغيره ابيض واسود خاصه بالبلد وتوزع مجانا ( وعربيه ميه ترش البلد ليل نهار حرام يعنى الواحد يلبس ويتشيك ويحط جل وعلبال مايوصل ع المحطه يلاقى نفسه كله تراب

  أفكار وآراء جميله والله
تسلم يا فنان طبعا أخونا محمد رسام كبير جدا من الدرجة الرفيعه جدا
ومصمم رائع
وله آراء محترمة جدا

سأوافيكم بجميع آراء الناس تباعا

 

 

الأخ نبيه طه
لعلك قريب الأخ سعد طه
بداية هى فكرة جيدة أحييك عليها ـ ولا تيأس يا عزيزى
ستواجه كثيرا من المشاكل ، نحن أقصد فى حارة الصوابر
ونادى النصر فعلناها فى الخمسينيات وكنا نطلب من كل
أسرة أن تكنس وترش مياه أمام بيتها وكنا نجمع ماكنسوه
ونحرقه فى ميدان الشعب قبل أن يكون ميدان وكان
مجرد أكوام من القمامة ، وكنا نقول لهم أنه هناك مسابقة
لأحسن شارع وفعلا كنا نعلن وهم مبسوطين بذلك لأنهم أهلنا
كان كل واحد فى النادى مسئول عن شارع يسكن فيه
وكانت الشوارع نظيفه فلماذا نبدأ بالناس والتوعية
وكلنا أهل ، بعض من لم يتوظفوا وهم كثيرون وبدلا من النوم
طول النهار يصحوا بدرى ويتابعوا ، وبعض العقلاء أيضا
فكرة جيدة ذكرتنى بالذى مضى ، لا تيأس والله الموفق .

 

سيدداود كتب:

الأخ نبيه طه
لعلك قريب الأخ سعد طه
بداية هى فكرة جيدة أحييك عليها ـ ولا تيأس يا عزيزى
ستواجه كثيرا من المشاكل ، نحن أقصد فى حارة الصوابر
ونادى النصر فعلناها فى الخمسينيات وكنا نطلب من كل
أسرة أن تكنس وترش مياه أمام بيتها وكنا نجمع ماكنسوه
ونحرقه فى ميدان الشعب قبل أن يكون ميدان وكان
مجرد أكوام من القمامة ، وكنا نقول لهم أنه هناك مسابقة
لأحسن شارع وفعلا كنا نعلن وهم مبسوطين بذلك لأنهم أهلنا
كان كل واحد فى النادى مسئول عن شارع يسكن فيه
وكانت الشوارع نظيفه فلماذا نبدأ بالناس والتوعية
وكلنا أهل ، بعض من لم يتوظفوا وهم كثيرون وبدلا من النوم
طول النهار يصحوا بدرى ويتابعوا ، وبعض العقلاء أيضا
فكرة جيدة ذكرتنى بالذى مضى ، لا تيأس والله الموفق .

أستاذى العزيز الأستاذ سيد داوود كم لى من الشرف بردك على موضوعنا المتواضع
وفى الحقيقة حضرتك قولت أفكار رائعه جدا وقابلة للتنفيذ فعلا وتبقه حملة شعبيه يشارك فيها الكل ونعمل مسابقات
أكرمك الله أفكار رائعه جدااااااا تضاف لبنك الإقترحات للموضوع
شكرا لك

 

وده كان أحد آراء الشباب على الفيس بوك



Alaa Shaheen ما شاء الله والله الواحد بيفرح اما بيلاقى شباب زى الورد بيفكروا فى البلد كده أولا عندى اقتراح للأخت اللى بتقول نقدم الوعى للناس دى حاجة ممتازة جداً وممكن الوعى دا يبقى ثقافى لو بتدعى الناس اللى مش متعلمة وكدا ونحاول لو يقرأو بس الحاجات البسيطة ويكتبوها لو الاسم الحاجة التانية موضوع التشجير اللى فى البلد نحاول نبين شجر الفيكس دة كل الشجى نعملة ديكور كويس واعتقد مش عاوز أهل خبرة كبيرة أنا لو موجود مع الناس المحترمة دى حعملة بنفسى ورأس مالة مقص كبير وصغير للتقليم او مقصين وانا ممكن اساهم انا بيهم أقل واجب الحاجة التانية براميل بلاستيك او حديد وتندهن ويتكتب عليها اى شيئ بسيط او شعار يحثهم على رمى القمامة بها وياريت تتحط فى الأماكن الرئيسية كالمواقف مثلا وامام المساجد وغيرة وتندهن بلون يكون ظاهر وليكن اصفر عشان يبان ودة عمل من أعمال الدعاية ونشر الفكر والوعى ايضا ولكم جميعا خالص الحب والتقدير

 

وده رأى آخر لأخونا حسين عبدالله
Abo Omar بسم الله نبدأ
اولا فكره مشروع برميل الزباله دى من طرح اخويا
لكن ياجماعه الخير الواد ده سرقها منى
ايام الرابطه طرحت هذه الفكره وتم عمل دراسة جدوى مبدأيه لها وكان اساسها ان كل شارع يقوم رجل منه يتمتع بالحس الوطنى والاخلاق والاحترام لدى اهل شارعه بجمع ثمن البرميل على ان لايزيد كل بيت عن دفع عشرة جنيهات بل بالعكس لن تتجاوز الخمس جنيهات
ويوضع البرميل على ناصيه كل شارع بعيد عن المنازل بحيث لايسبب ضرر لاصحابها من حشرات او رائحه فى حاله كثرة الزباله
ولكن هذا يتوقف على ان يتم جمع القمامه بشكل يومى من هذه البراميل وهذا عمل الوحده المحليه
بسم الله ابدأ بالتبرع بثمن برميل على ناصيه شارعى على ان يكون نقطة البدايه
والله الموفق

 

ياريت نشوف الفيديو تانى إللى محمد عبد الله عامله ونركز ونقول رأينا

 

سنشارك معكم بأمر الله ، ادعو الله وارجو ان يقوم العمل ولا ينتهي ابدا .

 

حسين باشا كتب:

سنشارك معكم بأمر الله ، ادعو الله وارجو ان يقوم العمل ولا ينتهي ابدا .

 شرف لنا يا حسين مشاركتك معنا
ونسأل الله العلى القدير أن يوفقنا جميعا لما فيه الخير
وأن يدوم العمل ولا ينقطع
فخير الأعمال وأحبها إلى الله أدومها وإن قل
شكرا يا سحس

 

• وده كان إقتراح من أخونا يسرى باشا
  
  
  
• [ندعوك للتسجيل في المنتدى أو التعريف بنفسك لمعاينة هذه الصورة]
  يسري باشا مشكلة وحل
  المشكلة : لدينا معظم الشوارع ٤ متر وأقل منا يصعِّب مهمة الجرار أر وسيلة النقل من الوصول لكل الأماكن
  
  الحل : انظر الصورة بالأسفل علما بأن الأشكال المظللة باللون الرمادي هي المستهدفة من النظافة واللون الأحمر يدل علي برميل النظافة المفترض
  بمعني يجب وضع البرميل عند أقرب نقطة لشارع ٦ متر مثلا
  
  وصلت الفكرة للجميع ؟؟
  

[ندعوك للتسجيل في المنتدى أو التعريف بنفسك لمعاينة هذه الصورة]

 

فى حسبة مبدأيه للبرميل وجدناه هيتكلف حوالى 120 جنيه بشكل مبدأى لتنفيذه بشكل يسمح لقلبه وتنظيفه ويريح العامل والمشكلة إللى هتواجهنا إن الوحده زى ما انتو فاهمين مش هتقدر تغطى البلد كلها يوميا وفى طبعا مشاكل أخرى هتواجهنا وبنحاول نحلها  فى تفاصيل مهمة جدا هنعرضها عليكم ونشوف انهارده بالليل ان شاء الله هقولكوا على كل حاجه