اهداء لكل من يريد ان يخضر دراسات عليا

يحكى أن خليل محتاس
كل يومين ماشي بكراس
ماشي يا عيني ما بين الناس
منصاب بكآبة ووسواس
عالكمبيوتر ليل ونهار
محبوس قاعد جوا الدار
مخه ياعيني مولع نار
والعقل اهو ضاع منه خلاص
بيذاكر على طول الخط
واليوم بيقضيه عالنت
ولا يعرف راجل من ست
ليل ونهار شغال أبحاث
تديله سؤال ما يجاوبوش
مع انه فصيح ما يهموش
وتشوفه صحيح بقى مرووش
يتنطط زي النسناس
ماحدش قالك ذاكر تاني
معاك باكلوريوس نفسك تاني
قال يعني هاتنجح في ثواني
وهاتطلع دكتور وخلاص
لا ياحبيبي ماكانش اتعز
ولا كان عمره اترمي للوز
وابقى اسأل خالد ومعز
لازم تدخل دبلوم خاص
بعده هاتدخل في التمهيد
يمكن يتقالك يا معيد
لكن فرحة يوم العيد
مش هاتشوفها ياعيني خلاص
بعده هاتعمل ماجيستير
ورسايل هاتجيبها كتير
وتحس انك لو بتطير
كان أسهل من وجع الراس
هايناقشك أحسن دكتور
وكمان يستلموك بالدور
وساعتها يبان المستور
وتبقى انت يا عيني المنداس
وتفتكروه كمل تعليم
عالدكتوراة صمم تصميم
ياخسارة ماطلعش سليم
طالع بيعد الأنفاس
ألف خسارة عليك يا خليل
والله بدري عليك يا جميل
قلبي معاك وكتابتي دليل
ماهو مش لوحدك كده محتاس

 

بجد انتا انسان رائع وشاعر كبير
جميل جدا وصفك لخليل
وجميل وصفك لتعليم فى مصر
شكرا جدا على ابداعك الجميل
دائما بالتوفيق للامام انشاء الله

 

وبجد والله انت اخجلت تواضعنا يا استاذ سيد

بكلامك الجميل جدا جدا الذي اسعد عندما اقرأه لدرجة اني صرت انتظره عندما اضع العمل على المنتدى الجميل

كل الشكر والتقدير

وربنا يصلح حال التعليم في مصر

امين